أسطورة المجد للشاعر فزااااااااع

راسي مصدع ولا ينفع بندوله
ما ينفع إلا القصيدة يوم اسويها
وما كل شاعر أهل الألات غنوا له
قصايد تستحق انك تغنيها
لو كل شاعر يهز المجتمع قوله
كان استوى عالي القمه و واطيها
وانا من العنبره تطيب لي توله
والمسك والعود التزرق في نواحيها
قصيدتي ما تجي والبيت ما اقوله
الا وانا مقتنع ي بيتي وفيها
منها ملوك الشعر في الأنس مذهوله
وملوك جن الشعر ماهي تجاريها
وما كل بيت يهز القلب مفعوله
يسري بي العر والفكرة اسريها
رسايل (أحمد) لا من جات مرسوله
راضي عليها ونفسي منه مرضيها
نوادر الشعر من شرواك مأموله
وبيوت شعرك على الاوزان بانيها
وجزل القوافي إلى غنيت مذهوله
قصيدتك تكسر الـ (تيم) بقوافيها
ما فيه بحر ما تعشق دره ولوله
كل البحور تشرف بك شواطيها
تدنوا لي بفكرك الموهوب وادنو له
واعاني من الظروف اللي تعانيها
والجادل اللي ينافس كل ميدوله
لا عاد تشقيك ولا عاد تشقيها
حياة (قيس الملوح) يوم لاحوا له
أحبابه الناس لين الناس تحكيها
و (جولييت) ماتت بغلطة حب مقتوله
القاتل الحب والغلطة من يديها
وشلون تلقى بظهر الحب قيلوله
مادام عينك لياليها ما تمسيها
إتعلم الحب با (أحمد) من اصوله
قدام سفن الهوى تهجر مراسيها
إتجيك من خدها والرمش وسدوله
اللي يميت البشر بامره ويحييها
إلى صفا لك زمانك .. روح بعجوله
إشرب قبل ما يوحش الطين صافيها
هذا زمان النعم والناس مخذوله
الذيب جايع وشبعانه حصانيها
ومشاعرك في وصف (اوزان ) مقبوله
(اوزان ) دايم تهنيني ..واهنيها
وشوط المنافس لها يزهو وتزهو له
تقول..كني على الاول موصيها
الفوز ورث لها من حوله لحوله
الكاس باسم امها ..والسيف لابيها
تسابق الريح لا من جات منتوله
مرة تقاصر لها ومرة تعديها
مساحة الارض من عرضه ليا طوله
محصورة بين ايديها ورجليها
دايم من الزعفران الزين مبلوله
لونه من خدها لا روس اذانيها
لون الذهب في نحر بنت لها صوله
تفرق عن اللي فاتنات حواليها
قصيدتي كنها في الريس مدبوله
فيها لياقه تغذيني ..واغذيها
لا تعلل النفس دام النفس معلوله
أسرارك ادريبها لو كنت تخفيها
إضحك لو النفس بالأحزان محموله
أعداك من ضحكتك تقدر تبكيها
الانسان دايم حسب فكرته وميوله
واهل المبادي باتنجز من مباديها
والكلمة اللي على الأسماع مقبوله
أخير من اللي وسط القلب كانيها
ومن يزر الفول يجني حبه الفوله
حسب ما تزرع يده تطلع مجانيها
أحد طموحه في مشروبه وماكوله
والوجبه اشلن يطبخها ويشويها
يحط له خبزتين..وشوي تبوله
ويقند الراس من فنيال كوفيها
واحد يطرى بفعله .. وواحد بزوله
أداري نفوس ونفوس ما اداريها
إقلط هنا كلها بوشهاب منشوله
البنت بنتك.. ومن حقك تسميها
ناس تدور رضاها الناس وتنوله
لو انها عاريه الافكار تكسيها
وناس على الناس محفوله ومكفوله
عراه رغم الثياب اللي يكسيها
الناس ترثى بعد ما تموت معقوله
وش رايك فـ ناس قبل تموت نرثيها
واسطوره المجد نائب ريس الدوله
داره بطاريه فوق السحب طاريها
نظرته دايم على دولته مشموله
من بحرها لين مجرى سيل واديها
كنها من جنه أهل الخلد موصوله
نسخه من الجنه الخضرا وما فيها
صنع سموه من ابداعه ما يسمو له
لو للزمن هامه لرضاه..يحنيها
كل الخطاوي ورا خطواته مجبوله
زعيم لان اقدامه سادت خطاويها
شعر سمو الشيخ حمدان بن محمد بن راشد آل مكتوم "فزاع"
mo0ody girl